مستحيل الحب.

بقلم الدكتورة، :شيماء صبحي

الحب يظهر فى الكلام والجمل المزوقه وعدد المكالمات وكمية الأسئله …. اغلبهم جوع عاطفى واقرب منه للوهم والخيال ..

• الحب بيظهر فى الأوقات الصعبه لما العلاقه تتعرض لطوفان وزلزال وخدوش بشريه … جوانا عيوب وأنانيه وطمع فى كل حاجه حلوة … الحب بيظهر فى تصميم كل واحد أنه يوصل الطرف اللى قدامه لبر الأمان مش يعلى صوته بعيوبه ..
• الحب كميه التفاصيل الصغيره اللى بنداويها واحدة واحدة … الشوك اللى فى الورد مخلوق بيه وأنت بتستمتع بشكله وريحته ، انزع الشوك بهدوء لو اتسرعت أو بقيت غشيم مش هينوبك منه غير الجروح …
• الحب هو كميه الألم لما تبقى العلاقة بتنتهى بسببك وتبقى عاجز انك تنقذها علشان انت السبب ..
• الحب هو العلقه اللى بتاخدها وجلد الذات وانتوا متخاصمين ..

سيبوا مساحه للإيمان بإختياركم يطبطب عليكم للإيمان بنفسكم وحسن ظنكم ان انتم عوض ربنا لبعض بعد سنين عجاف .. المؤمن عمره ما خاف

سيبوا مساحه انتوا مش ملايكه وطبطبوا على نفسكم بنفسكم … اللى يلاقى حد فيه عيوب خمسين فى الميه يمسك فيه بإيده وسنانه وبراحه يوصلها للكمال … انتوا بشر
لو كل واحد اتخلى عن حلمه هيعيش ناقص روح .. ناقص حلم … ناقص حياه
العلاقه السهله اللى مفهاش زعل اقل ظرف بيفتتها مليون حته .. اعذروا بعض وسامحوا بعض واحضنوا بعض .. من منا بغير خطيئه ..

• الحب مش فى كلمه بحبك .. قد ماهو فى كلمه فاهمك … عاذرك … مسامحك .. قد ماهو فى كلمه أنا آسف هتغير .. ويتغير ..