خيانة عهد

بقلم :حنان محمود

عهدك وعهدي ..اتنين متعاهدين لا تفرقهم دنيا ولا يكسرهم مين
قلب اتمني يعيش وياك … فضل يحلم بأمان في دنياك
ماخدش منك غير قسوة …قدمت ليك اغلي ماعندي ..قدمت لي شك وحيرة
قدمت ليك حياتي ….. عيشت احلم معاك بحياة تانيه مفيهاش خوف مفيهاش قلق مفيهاش وجع ولا حتي ليال ضلمه
حسيت بحضنك الدافي اللي كان بيضم قلبي كأنه سكاكين بتقطع شرياني وكأن حبك ليا كان تمنه حياتي
لياليك كانت ونس صبحت حزينه وساكته ..مفيهاش حياة
وبدال ايديك ماتطمني وعليا تطبطب ..بقت بتقتل كل مابينا
مش مستغرباك انا بس بعاتب قلبي كان ازاي شايفك امان
ليه لما بحس بضياعي مش بتراعي
انا حياتي كانت فيها شرخ لما حضنتني كنت فاكراك بتلم بايدك جرحي وتداويه ..لكن حضنك كان قاسي كسر حياتي بعد ماكانت عايزة يدوب ترميم
ورجعت للصفر من مكان مبدات
ومع الوقت بلملم حياتي من جديد ومع الصبر هيهون كل عسير
نسيت اقولك صحيح عهد اللي كان بينا بتسألني عليك
هرد عليهم بايه ؟
كتير ناس سألتني هو فين ..هو مين ..
وانا برد بكل ثقه هو أعظم من كل عظيم ..هو أنبل من كل نبيل هو سكني وهدوئي وانفعلاتي وزعلي وحيرتي وقلقي واطمأناني وكلامي وصمتي وفرحتي وحزني وضحكتي ودموعي
هو كل حاجه واي حاجه
بكره هقول بردو لابني منك انك عظيم وانك صعب تتوصف
مش هقول عنك ولا كلمه تكسفك
ولا حتي هسمح لأي حد مهما بينا كان انه يعرفك
ده عهد وانا مش هخون
ولما اموت هيسالني عنك ربي هقول مسامحه ولا فاكره له في حياتي اي حاجه جارحه ده هو كان الأمل والألم والحزن والفرحه
هقول كان اهلي وكان ناسي بس هو ناسي
كان اماني وكان حناني بس هو مش هيرجع تاني
ياعهد اتعاهدت معايا عليه ..حته منك معايا بتفكرني بيه

ولو شاء القدر يحرمني من الحياة وصيتك عهدي
اصل العهد لو اتخان يبقي علي الدنيا السلام